19
May

මං තාම ප්‍රේමවන්තයෙක් - මහාචාර්ය සුනිල් ආරියරත්න

sunil-ariyarathna

ඔබ කුසීතයි කියලා වරක් ප‍්‍රකාශ කරලා තිබුණා.?

මං කුසීතයි කියලා කිව්වේ ගීත ලියන්න විතරයි. වෙන දේවල් වලට කුසීත නෑ.
ගී ලිව්වෙම නැද්ද?

පසුගිය අවුරුදු 7-8 ම ගීත 10වත් ලියලා නෑ.

කලකිරිලා ද?

ඔව්, සියළු මාධ්‍ය වලින් ඇහෙන සියලූ ගීත ගැන තියෙන අප‍්‍රසන්නකම හින්දා ගී ලියන්න කම්මැළියි?

ඔබේ ගීතවල වැඩිපුර තිබුණෙ පේ‍්‍රමය, එහෙම නේද?

ඔව්.

ඒ ඔබේ හදවතේ උතුරා යන පේ‍්‍රමයලූ?

රසිකයෝ එහෙම කියනවා.
ඔබ පේ‍්‍රමය අර්ථකථනය කරන්නේ කොහොමද?

පේ‍්‍රමය කියන්නේ පරම පිවිතුරු රමණීය අත්දැකීමක්.

ඔබ ඔහොම ලියපු පේ‍්‍රම ගී ඒ කාලයේ මහාචාර්ය සුචරිත ගම්ලත්ගේ නිර්දය විවේචනයට ලක් වුනා?
ඔව්.

ඊට එකඟද?
නෑ. මම එකඟ නෑ. ඒත් මම ඔහුගේ සමාජ විචාරාත්මක විචාර බොහෝදේ පිලිගන්නවා. විශේෂයෙන් ඇතම් ගීවල තිබුණු ජාතිවාදී ස්වරය ගැන ඔහු කළ ප‍්‍රකාශ මං පිලිගන්නවා.

තුන් හෙළේ කැලෑ තුළ සිංහ පැටව් ගීතය?
ඒ සම්බන්ධයෙන් මහාචාර්ය ගම්ලත් ඉදිරිපත් කළ අර්ථකථනය පිළිගන්න අමාරුයි. ඒක ජාතිවාදී ගීතයක් නෙමෙයි.

පේ‍්‍රමය විවාහයෙන් කෙළවර වෙන්නේ නෑ කියන සංකල්පය අද තරුණ පරපුරේ රිදමයක් වෙලා නේද?

එහෙම කියමනක් විදිහට කියලා නෑ. ඒක එකිනෙකාගේ රුචි අරුචිකම් මත තීරණය වෙන දෙයක්.

එවැනි ආස්ථානයක ඔබ හිටියේ බොහෝ කලකට පෙර නේද?

ඔව්. මගේ පේ‍්‍රම සම්බන්ධතා රාශියක් තිබිලා තියනවා. ගීතවලිනුත් ඒවා කියවිලා තියනවා. ඒත් ඒ එකක්වත් විවාහයෙන් කෙළවර වෙලා නෑ.

ඒ හින්දද තාමත් තනිකඩ?

ඒ හින්ද තමයි තාමත් මම පේ‍්‍රම ගීත ලියන්නේ. හැමදාම ආදරේ කරන්න පුලූවන් හින්දා? ආදරේ නැවතිල නැති හින්ද ඉඳහිට හරි ලියන ගීතයක පේ‍්‍රමය තිබෙනවා.

ඔබ තවමත් පේ‍්‍රමවන්තයෙක්ද?

ඔව්. මම ආදරයට ඉතාම ආදරය කරන පේ‍්‍රමවන්තයෙක්.

මහාචාර්ය ජේ.බී. දිසානායකත් ඔබේ පේ‍්‍රම ගීයකට හරස් වුණා?

ඔව්. මං ඒක සපුරා ප‍්‍රතික්ෂේප කරනවා. ජේ.බී. ‘සීගිරි ගීයක් ඔබේ හදවතේ ලියන්න දෙනවාද’ ගීය ඔබ වටහාගෙන නෑ.
ඒ කියන්නේ?

කවිය ගැන තිබෙන ප‍්‍රසිද්ධ ප‍්‍රකාශයක් තමයි ලොව නිල වශයෙන් නොපිළිගන්නා ලෝක පාලකයෝ කවියෝය. ඔවුන්ට මෙළොව කළ නොහැකි දෙයක් නැත. කියන දේ. ඒ හින්දා කවියෙකුට අයිතියක් තියෙනවා අරවිදියටත් ලියන්න. ඒකට කියන්නේ Poetic licence  (කවිකාර සහතිකය) කියලා. ජේ.බී. ඒක වටහාගෙන නෑ.
පවන ප‍්‍රසංගයේ ගී එදා රැල්ලට ලියපු ගී කියලා චෝදනාවක් තිබුණා?

ඒ චෝදනාව මං ප‍්‍රතික්ෂේප කරනවා. 80 දශකයේ අපේ තාරුණ්‍යය රැඳී තිබුනේ කැරලිකාර තරුණයන් එක්ක. කැරලිකාරයන්ගේ දේශපාලනයත් එක්ක.

ඔවුන් ආයුධ අතට ගත්තා?

ඔව්. ඔවුන් අයුධ අතට ගත්තේ කැරළි ගැහුවේ එවකට පැවති අයුක්තියට අසාධාරනයට එරෙහිව.

එතකොට ඔබ?

අපේ ආයුධ වුනේ වචන.

ඒව ඒ රැල්ලට ආව වචන නෙමෙයිද?

නෑ. අපේ හදවතේ කැකෑරිච්ච ආත්මය වචන වලට නැගුවා විනා ඒවා රැල්ලකට ලියූ ගීත නෙමෙයි.

පවන ප‍්‍රසංගයෙන් පස්සේ ඔබ ඉන්දියාවට පලා ගියා?

ඔව්. ඒ ප‍්‍රසංගය ජ.වි.පෙ.ට සහාය පළ කළා කියලා චෝදනාවක් ආණ්ඩුවෙන් එල්ල වුණා.
ඉතිං?

ඊට පස්සේ පාතාල කල්ලිවලින් මරණීය තර්ජන ආව. එක රැයකින් ඉන්දියාවට පලා ගියා.

ඔබත් එක්ක නන්දා මාලනිත් ගියා?

ඔව්. ඇයත් ගියා.

ඉන්දියාවේ කොහෙටද ගියේ?

තමිල්නාඩුවට. එහේ හරිම කටුක ජීවිතයක් ගත කරන්න වුණා. කන්න බොන්න ටිකත් හොයා ගන්න අමාරු වුණා. මාස කීපයක් ඉබාගාතේ ඇවිදගෙන ගියා.

ඒ අත්දැකීම වෙනත් විදියකට ඔබට ප‍්‍රයෝජනවත් වුණා නේද?

ඔව්. මං එහිදී දෙමළ ඉගෙන ගත්තා. කටුක වුනත් ජීවිතයට බොහෝ දේ එක්කර ගත්තා.

ජාතිකත්වය පිළිබඳ ඔබ ඉන්නේ මොන වගේ ආකල්පයකද?

මං පැහැදිලිවම සිංහල හෝ දෙමළ අන්තවාදය සපුරා ප‍්‍රතික්ෂේප කරනවා.

වරක් නන්දා මාලනී අහල තිබුණා ජාතිය ගැන කතා කිරීම වරදක්ද?
කියලා

ජාතිය ගැන කතා කිරීම වරදක් නෙමෙයි. ඒත් සිද්ධ වෙන්නේ ජාතිකත්වය පටලවා ගැනමෙන්.

ඇය ගැයූ ‘‘මේ සිංහල අපගෙ රටයි’’ වගේ ගීත සිංහල ජාතිය උත්කර්ෂයට නංවපු ඒව නෙමෙයිද?

සේකර ඒ ගීතය ලියුවේ එක් ජාතියක් උතුම් කරන අරමුණින් කියලා මං හිතන්නෙ නෑ. ඇස්. මහින්ද හාමුදුරුවන්ටත් ඔය චෝදනාවම එල්ල කළානේ. මගේ මහින්ද ප‍්‍රබන්ධ පොතේ ඔය කාරණාවට හොඳ උත්තරයක් දීල තියනවා.

තවත් ජාතියකට අසාධාරණයක් නෙමෙයිද?

‘‘මේ සිංහල අපගෙ රටයි’’ සේකර ලියපු චිත‍්‍රපට ගීතයක්. ඒ ගීතය හුදකලා කරල ජාතිවාදියි කීම නිර්දය විචාරයක්. එහෙම කිව්ව එකම එක්කෙනා මහාචාර්ය ගම්ලත් විතරයි.

නන්දා මාලනීට වැඩියෙන්ම ගී ලිව්වේ ඔබ?

ඔව්. තනි ගී රචකයෙක් විදිහට ගත්තොත් මම ඒත් ඊට සමානව වගේ වෙනත් රචකයන්ගේ ගීතත් ඇය ගයා තිබෙනවා.
ඒ වුනාට ඔබේ ගීතත් එක්ක ගත්තහම ඇය කිසියම් තැනක කොටුවෙලා කියලා හිතිලා නැද්ද?

මගේ ගී ඇගේ හඬින් ජනප‍්‍රිය වුණා. අමරදේවයන් බොහෝ ගී ගැයුවත් වැඩිපුර කතා බහට ලක් වූණේ සේකර ලියූ ගීතනේ ඒවගේ තමයි නන්දා ගැයූ මා ලියූ ගීත ගැනත් කතා කරනවා.

නන්දා මාලනිත් ඔබත් අතර තිබෙන සුසංයෝගය අව්‍යාජව අර්ථකථනය වෙන්නේ කොහොමද?

කලා ලෝකයේදී බොහෝ දෙනාගේ හෘදයාංගම එකතුවීම් අදහස් ගැළපීම් තියෙනවා. අපි දෙන්නත් ඒ වගේ.
එපමණද?

මගේ ගීත රචනා නන්දාගේ ගායනා දෙපාර්ශවයම අන්‍යෙන්‍ය වශයෙන් පෝෂණය කළා. මට ගීත රචකයෙක් හැටියට ගමනක් යන්නත් ඇයට ගායිකාවක් විදියට ගමනක් යන්නත් මේ සම්බන්ධය හේතුවුනයි කිව්වොත් නිවැරදියි.

අද මේ හැම දෙයක් දිහාම ආපහු හැරිලා උපේක්ෂාවෙන් බලන්න පුළුවන්කමක් තියෙනවාද?

ඔව්. මං මගේ ගීතය ගැන තෘප්තිමත්. මං ලබා ගත්ත දැනුමෙන් නිර්මාණ ශක්තියෙන් ගීතයට සාහිත්‍ය කලාවට අල්පමාත‍්‍ර හෝ සේවයක් කරන්න ලැබුණා කියලා සතුට මට තියෙනවා.

ඉතිරි කාලය?

පසුතැවීමක් නෑ. ඒ සතුට තියෙන හින්දා ඕනෑ වෙලාවක මැරෙන්න ලෑස්තියි.


(ඉරිදා මවුබිම 19.05.2013)

Share

THUNDENEK - HER. HIM. THE OTHER

Find us on Facebook

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday253
mod_vvisit_counterYesterday269
mod_vvisit_counterThis week522
mod_vvisit_counterLast week10118
mod_vvisit_counterThis month11945
mod_vvisit_counterLast month7172
mod_vvisit_counterAll days2125448

Follow us on Facebook

Online Users

We have 26 guests online