28
Apr

සුදුස්සාට සුදුසු තැන- හුණුවටයේ කතාව

සෘජුවම විරෝධාකල්ප දනවන බොහෝ නිර්මාණවල ගැබ්වන සටන්පාඨ ස්වරූපය මා සිත නොගනියි. අනිත් අතට අවනත ව පවත්නා ක‍්‍රමයට මෙහෙකරන නිර්මාණ ඊටත් වඩා සිත් නොගනියි. කලාත්මක විරෝධය සමග එකග නොවී බැරිය. විසිවන සියවසේ විවාදාපන්නම නාට්‍යකරුවා ලෙස හඳුනාගත හැකි බර්ටෝල්ට් බ්‍රෙෂ්ට් නම්වූ ජර්මන් ජාතික නාට්‍යකරුවා අප ග‍්‍රහණය කරගන්නේ මෙකී ප‍්‍රබල කලාත්මක විරෝධයෙනි.

ඔහුලේ නාට්‍ය බොහොමයක් සිංහලයට පරිවර්තිතව මෙරට වේදිකාවේ ප‍්‍රදර්ශනය වූ අතර ඒ සියල්ලෙහිම අඩුවැඩි වශයෙන් ගැබ්ව පැවතියේ යුධ සංහාරයෙන් හා ඒකාධිපතිවාදයෙන් පීඩිත අවධියක නොතකා හරින ලද සාමාන්‍ය මිනිසාගේ අතිප‍්‍රබල විරෝධාත්මක මැදිහත් වීමයි. ඔහු මෙතෙක් බටහිර රංගකලාවේ සුප‍්‍රකටව පැවති ඇරිස්ටෝටලියානු රංග ෙසෙද්ධාන්තික පදනම කණපිට පෙරළමින් පේ‍්‍රක්ෂකයාගේ බුද්ධියට ආමන්ත‍්‍රණය කරන්නට වෑයම් කළේය. බ්‍රෙෂ්ට් නිර්මාණය කළ  the caucasian chalk circle    නාට්‍ය හෙන්රි ජයසේන විසින් හුණුවටයේ කතාව නමින් සිංහලයට පරිවර්තනය කෙරිණි.


බ්‍රෙෂ්ට් රංගශෙලිය අතින් පමණක් නොව වස්තු විෂයානුගතව ද සාම්ප‍්‍රදායික වෘත්තාන්න බිඳදමන අයුරු මෙම නාට්‍යය මගින් පැහැදිලිව හඳුනාගත හැකිය. සාමාන්‍යයෙන් දරුවකු අයිති වැදූ මවටය. උම්මග්ග ජාතකයේ දරු ප‍්‍රශ්නය, බයිබලයේ සොලමන් රජුගේ කතාව, චීන කතා ආදියෙහි ද එසේ තම දරුවා පැහැර ගැනීමට පැමිණෙන්නියක හා සමග ගැටී දරුවා ලබාගන්නා වැදූ මවක ගැන කියැවේ. බ්‍රෙෂ්ට් මෙහිලා මයිකල් කුමාරයාගේ අයිතිය පවරන්නේ ඔහු වැදූ මව මෙන්ම යුවරජුගේ බිරිඳ වන නටාලියා අබෂ්වල්ලිට නොව රජ ගෙදර මෙහෙකාර දැරියක වන ගෲෂාටය. දරුවා හැදූ මවටය. ඔහු වෙනුවෙන් හදවත මෙළෙක් වන කාරුණික යුවතියටය. මෙය වනාහි පීඩිත පාන්තිකයාගේ ජයග‍්‍රහණයකි. නාට්‍යකරණයේ දී ඇරිස්ටෝටල්ගේ සිද්ධාන්තයන්හි පැනෙන නාට්‍යමය සිද්ධාන්තයන්ට වඩා වීර කාව්‍ය රීතිය කෙරෙහි නැඹුරු බවක් පෙන්නුම් කළ බ්‍රෙෂ්ට් සිය නිර්මාණයන්හි වීරයා හෝ වීරවරිය බවට පත්කළේ මෙහෙකාර යුවතියක, ගණිකාවක, මහලූ මවක, සොරෙකු ආදින්ය.

සාමාන්‍යයෙන් පහත්යැයි සම්මත පුද්ගලයන්ගේ හෘද සන්තානයේ පවත්නා මෘදුමොළොක්කම්, අදීනතා. විරුද්ධ වීමේ හැකියාව, මානුෂීයත්වය, වීරත්වය ප‍්‍රබලව නිරූපණය කිරීමට වෑයම් කරන නාට්‍යකරුවා සම්මත දැක්මෙහි පවත්නා අඩුලූහුඩුකම් මනාව ගම්‍ය කරයි. ව්‍යාජ ආටෝපයන්, යටපත් කෙරුණු මතවාද, භීෂණය ආදියෙන් සපිරුණු සමාජ ක‍්‍රමය අතුරෙහි අප කෙතරම් මුග්ධයන් ලෙස හැසිරෙන්නේද යන්න ඔහුගේ දෘෂ්ටිපථයට හසුවේ. අප තුළ පවත්නා යහපත් බව ම අපට සතුරු බලවේගයක්ව නැගී සිටින කල අවට ලෝකයා කෙතරම් විසුළු` සහගතව සිනා නගන්නේද යන්න එමගින් හඳුනාගත හැකිය.

හුණුවටයේ කතාවේ ප‍්‍රධාන චරිතය ලෙස හඳුනාගත හැකි ගෲෂා සම්බන්ධයෙන් ඉදිරිපත් කෙරෙන අතිශය නිර්මාණාත්මක වාගාලාපය වන්නේ ”බලන් මේ අරුමය.. යහපත් බවේ ශාපය...” යන්නයි. ඇයට මයිකල් කුමාරයා තනිකළ නොහේ. ඔහු රැුගෙන යාම තම ජීවිතයට අවදානමක් වන බව දැන දැනම ගෲෂා ඔහු කරපින්නාගෙන යයි. ඔහු රැකගැනීමට හා ජීවත් කරවීමට දරන අධිකතර වෙහෙස පෙරළා උපස්තම්භක වන්නේ දරුවා කෙරෙහි ඇගේ හදවත දැඩිව බැඳ තැබීමටය. දරුවාගේ අයිතිය විනිශ්චය කරනු පිණිස ඔහු හුණුවටයක් මැද තබා තමා දෙසට ඇදගන්නයැයි විධාන කළ කල්හි වුව ද ඇයට එසේ කළ නොහේ. එවේලේ ඇය පසුුබා සිටින්නේ තමන්ට දරුවා දෙකට ඉරන්නට බැරි බව කියමිනි. වචනයේ පරිසමාප්ත අර්ථයෙන් ම මවකගේ ගුණය ප‍්‍රකට කරමිනි. සාම්ප‍්‍රදායික කතාවන්හි දරුවා වැදූ මවටම අයිති වුවද මෙහිලා බ්‍රෙෂ්ට් එම සම්මතය නිශේධනීය කරන්නේ විප්ලවීය ලෙස නව්‍ය දෘෂ්ටියකින් සමාජය දෙස බැලීමට අවකාශ සලසා දෙමිනි.

”දෙයක් වේ නම් යම්
සුදුසුසාටම අයිති විය යුතු
මකියනා ලෙස මෙලෙද
ලැබිය යුතු අයමය ලැබිය යුතු”

යනුවෙන් හෙළිදරව් කරන මූලධාරණාව ප‍්‍රබල ලෙස අප ආකර්ෂණය කරගන්නේ එහි අසාධාරණයක් නොමැති බැවිනි. මෙසේ ප‍්‍රබල දේශපාලනික සවිඤ්ඤාණිකතාවකින් සමූපේතව බ්‍රෙෂ්ට් ගෙනහැර දක්වන අනුභූතීන්හි ගැබ්වන ප‍්‍රබලතාව අද්විතීය වේ. ඔහුගේ නාට්‍ය සපුරා දේශපාලනිකය. අනිත් අතට මනා සේ කාව්‍යාත්මක ගුණයෙන් සමන්විතය. සුදුස්සාට සුදුසු තැන ප‍්‍රදානය කෙරෙන සමාජ ක‍්‍රමය පිළිබඳ ඔහු දල්වන අපේක්ෂා හුදු මනඃකල්පිත තත්ත්වයකට ලඝු නොවන තරමට අව්‍යාජය. රාජ්‍යතන්ත‍්‍රය, නීතිය, නිලධාරීන්ගේ භූමිකා යනාදියේ ජුගුප්සාජනක කඩඉම් හෙළිදරව් කරන අතරම හද කකියවනසුලූ සියුම් මිනිස්භාවයන්හි ළගන්නා බව සංස්පර්ශයට ද ඔහු එකෙ සේ සමත්ය. බ්‍රෙෂ්ට්ගේ නාට්‍ය හුදු රසාස්වාදය අතික‍්‍රමණය කරමින් පේ‍්‍රක්ෂකයා මනා දැනුවත්භාවයේ ඉම්පෙදෙස් කරා ගෙනයන නමුත් ඒවා වියළි නැත. බුද්ධියේ බරින් පීඩිතව රසසුන්ව නැත. මෙහෙයින් කලාත්මකව විරෝධය පෑම හුදු සටන්පාඨයන්ගෙන් ඔබ්බට යන නිර්මාණාත්මක ගැඹුරක් විශදකරන්නක් බව අවබෝධ කරගත හැකිය. බ්‍රෙෂ්ට් අපගේ මනසට අමතමින් හදවත ද දිනාගනී. විනාශකාරී සියල්ල කෙරෙහි විරෝධයත් සුපුෂ්පිත යහප‍්‍රාර්ථනා පිළිබඳ  ළැදියාවත් ජනිත කරන හෙතෙම ජීවත්වීමේ සටන තවදුරටත් පවත්වාගැනීමට ශක්තිය ප‍්‍රදානය කිරීමට පසුබට නොවේ.

-චින්තා පවිත්‍රානි


Share

THUNDENEK - HER. HIM. THE OTHER

Find us on Facebook

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday317
mod_vvisit_counterYesterday149
mod_vvisit_counterThis week466
mod_vvisit_counterLast week1999
mod_vvisit_counterThis month4711
mod_vvisit_counterLast month7983
mod_vvisit_counterAll days2150264

Follow us on Facebook

Online Users

We have 27 guests online